UMDLALI wasesiswini weMidlands Wanderers, uMnelisi "Carrot'' Ngcongo, kulindeleke ukuthi asize leli qembu liqede esicongweni se-log kaStream A kwi-ABC Motsepe League
Image: MIDLANDS WANDERERS FACEBOOK
IMIPHUMELA yangempelasonto yeSafa KwaZulu-Natal ABC Motsepe League iphinde yacacisa ukuthi umbango wesicoco kuStream A wakulesi sigaba uzonqunywa yimidlalo emibili yokusonga isizini.
IMidlands Wanderers esaqhwakele kuStream A, ibuye namanye amaphuzu ngempelasonto ishaya uMkhumbane Classic ngo 2-1, ngenkathi uMvoti uvulela isibhaxu sika 1-0 kuLundi United. INjampela FC ilahle amaphuzu ibambana ngo 2-2 neDurban Pioneers. IWanderers, uMvoti neNjampela yiwona amaqembu abanga ukuqeda eqhulwini kuStream A.
Ukunqoba kweMidlands noMvoti kuqhubekile nokushubisa umbango. INjampela, esendaweni yesithathu ngamaphuzu angu-28, izenzele phansi ngokwehluleka ukuwina kwiPioneers. Isisele emuva ngamaphuzu amahlanu kwiMidlands eqhwakele ngangu-33. Ilandelwa wuMvoti ngangu-30.
Njengoba umbango wesicoco kuStream A uphakathi kwala maqembu womathathu, sekukhomba ukuthi imidlalo emibili ewasalele ukusonga le sizini, iyona esizocacisa ngeqembu elizogcina lidlale umdlalo wokuhlunga umpetha wesifundazwe noMkhambathi FC ozidlele amahlangu kuStream B ingakasongwa isizini.
Umdlalo obhekwe ngabomvu kule mpelasonto ngophakathi kweNjampela noMvoti ngoMgqibelo ngo-3 ntambama, ePrince Mangosuthu Stadium, oLundi.
Umphumela walo mdlalo yiwona ozocacisa ngokuthi iNjampela isazoqhubeka yini nokuba sembangweni. Ukulahla kwayo amaphuzu kulo mdlalo kuyobe sekuyikhipha unomphela embangweni.
Ngasohlangothini loMvoti, ukunqoba kwayo lo mdlalo kuzokwenza iqhubeke nokuba sembangweni.
IMidlands izotholana phezulu noLundi United ngawo uMgqibelo ngo-3 ntambama, eHarry Gwala Stadium, eMgungundlovu.
Nawo lo mdlalo ubalulekile kwiMidlands njengoba ukunqoba kwayo kungaqhubeka nokuyibeka ethubeni elihle lesicoco kunezimbangi zayo.
UMkhambathi osulinde iqembu likaStream A ozodlala nalo kowamanqamu okuhlunga iqembu elizomela iKwaZulu-Natal kumaPlay-Offs kazwelonke e-ABC Motsepe League, uphinde waqhubeka nokukhonya unenebula iNewcastle All Stars ngo 5-0.
Ukuqhubeka koMkhambathi nokuzidlela amahlanga kuStream B, kuyinkomba yokuthi leli qembu lingase liqede isizini lingalahlanga nelilodwa iphuzu kule sizini.