ISETHENJWA seDurban City, uSaziso Magawana (ophethe ibhola) esithathwe sigadulisa uKhomotso Marebane we-University of Pretoria, singomunye wabadlali abamqoka leli qembu elithembele kubona embangweni wesicoco seligi yeMotsepe Championship
Image: BACKPAGEPIX
UKUQHUBEKA kweDurban City nokuqhwakela kwi-log yeMotsepe Foundation Champion kuya ngokuya kuyiphonsela inselelo yokugcina umgqigqo kuze kube sekugcineni njengoba sekusele imidlalo embalwa isongwe isizini ka-2024/25, yalesi sigaba esiphakela eseBetway Premiership.
ICity okuyiyona esazihola phambili kwi-log yeMotsepe Championship ngamaphuzu angu-46, yehlukaniswe ngamaphuzu ayisithupha nezimbangi zayo i-Kruger United esendaweni yesibili ngangu-40, i-Casric Stars esendaweni yesithathu ne-Orbit College kweyesithathu ngangu-39 ngokwehlukana.
Nakuba ngokwezibalo iCity kuyiyona okubukeka isethubeni elingcono kakhulu lokukhala yemuke nesicoco seligi njengoba idinga ukunqoba imidlalo emine kweyisithupha esele, kodwa ukwehluleka kwayo ukubuya namaphuzu aphelele emidlalweni yayo yakamuva kuyiphonsela inselelo yokushintsha umshovo emidlalweni elandelayo ukugwema ingozi yokuphuma kweqhina embizeni sekuthenjiwe.
ICity ebuye nephuzu ekuhambeni ibambana ngo 1-1 ne-University of Pretoria, ibuya ngomunye umdlalo wasekuhambeni ezowudlala neHighbury, eGelvandale Stadium, eGqeberha, ngoMgqibelo ngo-3 ntambama.
Ngakolunye uhlangothi, iKruger izotholana phezulu neBlack Leopards, Kanyamazane Stadium, Kanyamazane, ngeSonto ngo-3 ntambama, ngenkathi iCasric idudulana neBaroka FC.
Kuthi i-Orbit itholane phezulu neCape Town Spurs, kusasa ngo-7.30 ebusuku, e-Athlone Stadium, eKapa.
ICity eqeqeshwa nguSimo Dladla inenselelo yokubuya namaphuzu aphelele kulo mdlalo wayo wasekuhambeni neHighbury ukuzehlisela ingcindezi, njengoba ukulahla kwayo amaphuzu kulo mdlalo kungase kuvulele iKruger ithuba lokuvala igebe kakhudlwana.
IKruger engagayelwa mphako kulezi zinsuku, ukushaya kwayo iMilford FC ngo 2-1 ngempelasonto edlule ePrincess Magogo Stadium, KwaMashu, ngenkathi iCity ilahla amaphuzu ngokubambana namaTuks, kukubeke ngokusobala ukuthi ingayidlisela ogageni iCity uma ingase iphinde ilahle amanye amaphuzu.
Leli qembu laseMpumalanga emidlalweni eyisithupha yakamuva, linqobe emihlanu ladlala ngokulingana kowodwa, okuwuphawu lokungasinisi mahleza kwalo ngezinhloso zokushisa umbango wesicoco seligi.