UMSUBATHI wakuleli, u-Akani Simbine, umshiye othulini owaseKanye, uFerdinand Omanyala, emjahweni ka-100m kwiFNB Botswana Grand Prix.
Image: BOTSWANA GRAND PRIX / FACEBOOK
UPHINDE wakhombisa ukuthi usengomunye wabahamba phambili emhlabeni umsubathi wakuleli, u-Akani Simbine, enqoba igolide emjahweni ka-100m wabesilisa kwiFNB Botswana Grand Prix, eGaborone, ngoMgqibelo ntambama.
USimbine unqobe lo mjaho ngo-9.90, okuyisikhathi esisahamba phambili emhlabeni kuleli banga kulo nyaka. Ushiye uFerdinand Omanyala waseKenya, ongene endaweni yesibili ngo-10.00, noRetshidisitswe Mlenga wakuleli, olale isithathu ngo-10.15.
Komunye ka-100m wabesilisa kunqobe owakuleli, u-Abduraghmaan Karriem, ngo-10.07, walandelwa nguKarabo Mothibi waseBotswana ngo-10.25, uKarabo Letebele wakuleli wangena endaweni yesithathu ngo-10.28.
Abanye bakuleli abathole izindondo zegolile u-Njabulo Mbatha, onqobe umjaho wama-hurdles wabesilisa ka-400m ngo-49.06, noSinesipho Dambile onqobe owesibili ka-200m ngo-20.01.
UHannah Van Niekerk uphume phambili kowabesifazane ka-400m, kanjalo noHanna Vermaak koka-100m. U-Jo-Anne du Plessis udle umhlanganiso kwi-javelin yabesifazane ngokuphonsa u-61.23m.
Komunye umjaho obubhekwe ngabomvu ka-200m, intandokazi yaseBotswana uLetsile Tebogo inqobe ngo-20.23, yalandelwa nguLuxolo Adams wakuleli ongene ngo-20.42.
UZakithi Nene ungene endaweni yesibili kowabesilisa ka-400m ngo-44.68, walandelwa ngomunye wakuleli, uLythe Pillay, oshaye u-44.97. Lo mjaho unqotshwe ngu-Bayapo Ndori waseBotswana ngo-44.35.
Related Topics: