UMENGAMELI weSafa KwaZulu-Natal, uKwenzakwakhe Ngwenya, usekuqinisekisile ukuthi azovela phambi kwekomiti eliqondisa ubugwegwe amaqembu amabili, iMidlands Wanderers neNjampela FC, abalandeli bawo abasuse udweshu komunye wemidlalo yokusonga isizini yeSafa KwaZulu-Natal ABC Motsepe League eHarry Gwala Stadium, eMgungundlovu, ngoMgqibelo.
Image: FACEBOOK
UMENGAMELI weSafa KwaZulu-Natal, uKwenzakwakhe Ngwenya, usekuqinisekisile ukuthi azovela phambi kwekomiti eliqondisa ubugwegwe amaqembu amabili, iMidlands Wanderers neNjampela FC, abalandeli bawo abasuse udweshu komunye wemidlalo yokusonga isizini yeSafa KwaZulu-Natal ABC Motsepe League eHarry Gwala Stadium, eMgungundlovu, ngoMgqibelo.
Kuvela ukuthi uke wama isikhashana umdlalo weWanderers neNjampela ka-Stream A weKZN Motsepe League ogcine uphele zibambene ngo 1-1, abalandeli bala maqembu bejikijela amabhodlela enkundleni.
Ngokomthombo obusenkundleni, umsindo uqale ngemuva kokuba umdlali weMidlands egadle koweNjampela obesalinde ukunikwa ikhadi ngunompempe kulandela ukudlalisa kwakhe kabi oweMidlands, wabe esehlanganyelwa ngabeNjampela bemshaya.
Lona bekungumdlalo wokugcina wesizini wokunquma ngeqembu likaStream A elizoba ngompetha kulesi stream, njengoba iWanderers kuyiyona egcine iphumelela ngokuthola kwayo iphuzu okuyilona ebilidinga kulo mdlalo.
IWanderers yiyona esizodlala noMkhambathi FC odle umhlanganiso kuStream B, emdlalweni ozoba ngo-Ephreli 26 enkundleni esazomenyezelwa, wokuhlunga iqembu elizomela iKwaZulu-Natal kumaPlay-Offs kazwelonke e-ABC Motsepe League.
“Okwenzekile kulo mdlalo akubanga kuhle ngempela, angikuthandi. Ngingakuqinisekisa ukuthi womabili la maqembu azovela phambi kwekomiti eliqondisa ubugwegwe maduze.
Silinde umbiko kanompempe obephethe umdlalo, sizwe ukuthi uthini, bese sibona ukuthi yisiphi isinqumo esizosithatha,” kusho uNgwenya.
“Njengoba iMidlands noMkhambathi kuyiwona maqembu azodlala umdlalo wokuhlunga iqembu elizomela isifundazwe kumaPlay-Offs kazwelonke, osekusele manje ukuthi siqinisekise indawo ozodlalelwa kuyo lo mdlalo.”
UMkhambathi odle umhlanganiso kuStream B noqede isizini ungahlulwanga, ulahle iphuzu okokuqala kule sizini ubambana ngo 1-1 neKwaMashu Durban Knights, e-JL Dube High School Ground, KwaMashu, ngawo uMgqibelo.
Ukubhekana kweMidlands noMkhambathi emdlalweni wokuhlunga iqembu elizomela iKwaZulu-Natal kumaPlay-Offs kazwelonke, kusho ukuthi lizophuma esifundeni uMgungundlovu iqembu elizomela isifundazwe kwekazwelonke yokuhlunga amaqembu amabili azokhushulelwa esigabeni seMotsepe Foundation Championship.
Okwamanje isifunda uMgungundlovu asinalo iqembu esigabeni sePremier Soccer League (PSL) kulandela ukufudukela eThekwini kweMaritzburg United, efike eThekwini yashintsha igama yaba yiDurban City, nokumanje isemshikashikeni wokuzabalazela ukukhuphukela kwiBetway Premiership.