ABADLALI beMamelodi Sundowns bejabulela elinye lamagoli abawashaye ngesikhathi behlula iLamontville Golden Arrows emdlalweni weBetway Premiership eLucas Moripe Stadium, e-Atteridgeville, ngeSonto ebusuku Isithombe:BACKPAGEPIX
Mamelodi Sundowns (1) 4
Lamontville Golden Arrows (0) 0
IMamelodi Sundowns ithumele umyalezo oshubile emaqenjini azimisele ngokuyibangisa isicoco seBetway Premiership ixebula iLamontville Golden Arrows eLucas Moripe Stadium, e-Atteridgeville, ngeSonto ebusuku.
Amagoli eSundowns ashaywe nguLucas Ribeiro Costa kuyiphenathi esiwombeni sokuqala, Peter Shalulile amabili noTeboho Mokoena kwesesibili.
Bekungokwesihlanu iSundowns inqoba koweligi ngaphansi komqeqeshi uMiguel Cardoso oqashwe ngoDisemba emuva kokuxoshwa kukaManqoba Mngqithi. Ngokuqhubeka nokuvulela isibhaxu kwiPremiership, iSundowns ithumela umyalezo wokuthi kuzofanele asebenze ngokuphindiwe amaqembu afisa ngokuyehlisa esicongweni se-log okukhona kuwona i-Orlando Pirates esendaweni yesibili. AmaBrazilians asesicongweni ngamaphuzu angu-36 emidlalweni engu-13, ahlukaniswe ngayisithupha neZimnyama ezisendaweni yesibili.
Enkundleni, iSundowns iwuphathe zibekwa umdlalo, yakhombisa izinhloso zokushaya igoli ngokushesha. Lokhu kuphoqe ukuthi aphaphame unozinti we-Arrows, u-Ismail Watenga. AmaBrazilians aphoqekile ukwenza uguquko ngokushesha kulandela ukulimala kukaSiphelele Mkhulise, afaka uPeter Shalulile oshintshe umdlalo.
Umnyakazo kaShalulile uholele etholeni kwezakhe iphenathi ekeqwa nguWatenga ebhokisini, unompempe uChristopher Kistoor wayikhomba emlotheni. URibeiro uyibhajiswe ezintanjeni ngomzuzu ka-44.
Esiwombeni sesibili iSundowns iqhubekile nokucindezela. Ambalwa amathuba abetholwa yi-Arrows kwazise ibhola belihlala kwiSundowns isikhathi esiningi. Kwale ngisho seyenze izinguquko, ifaka isethenjwa uKnox Mutizwa endaweni kaBongani Cele.
UShalulile uvalele phakathi elesibili ngomzuzu ka-65, eqedela ibhola abelibekelwe ngu-Iqraam Rayners. Emuva kwemizuzu engu-15, ushaye elesithathu, eqedela uhlaba udle kaRibeiro.
Ngomzuzu ka-85, uTeboho Mokoena ushayele isipikili sokugcina, ededela inguzunga yeshodi engaphandle kwebhokisi yashaya kumdlali we-Arrows, yabhajwa ezintanjeni.
NgoLwesithathu, iSundowns izobhekana nomakhelwane iSuperSport United koweligi ngaphambi kokunqwamana nePirates ngoMgqibelo ePitoli.