ABADLALI beVarsity College Comets bejabulela ukunyukela esigabeni esiphezulu emqhudelwaneni wombhoxo, iVarsity Cup.
Image: Gerhard Duraan/Varsity Cup
UKUDLULA ngo 41-29 kweFNB Varsity College Comets, iqumba phansi iFNB WSU eDurban North ngoLwesine ntambama, kuholele ekutheni iqede esicongweni kwi-log yeFNB Varsity Shield.
Yize iWSU ibingazibekile phansi, iComets iphinde yalinyusa izinga, yaba yinyuvesi yokuqala yaKwaZulu-Natal ukukhuphukela esigabeni esiphezulu, iVarsity Cup.
Ama-try eComets ashaywe nguMambo Mkhize, Drico Marx, Robert Everson, Allston Cedras, Juan Steyl noCade Latham. UMarx uphinde wengeza amaphuzu ngonyawo lwakhe, ekhahlela ama-conversion amane kanye nephenathi eyodwa.
Awezivakashi ashaywe nguSibulele Manyube, Azasakhe Phuwani, Sipho Hobosch no-Ahlule Zokoza. UBeon Hartnick ushaye ama-conversion amabili, u-Isiphe Mbini washaya i-conversion eyodwa nephenathi eyodwa.
IComets iqhwakele ngamaphuzu angu-32 emidlalweni eyisikhombisa. Inqobe eyisithupha yahlulwa kanye.
I-WSU iqede endaweni yesikhombisa kwi-log ngamaphuzu ayisishiyagalombili ngenxa yokuthi ilithole ngokushaya ama-try amane.
Khonamanjalo, iNyuvesi yaKwaZulu-Natal izibeke engcupheni yokugawulwa yizembe kwiVarsity Shield iguqiswa yi-University of Fort Hare ngo 36-17 eHoward College Stadium ngoLwesine ebusuku.
I-UKZN Impi iqede emsileni ngamaphuzu ayisikhombisa emidlalweni eyisikhombisa. Isizobhekana neqembu elizohamba phambili emqhudelwaneni we-University Sports South Africa (USSA) ukuze kucace ukuthi yiliphi elizodlala kwiVarsity Shield ka-2026.
Related Topics: